هەواڵى ناوخۆ

ئەیاد عەللاوی: هەوڵ نادەم ببم بە سەرۆکوەزیرانی عێراق

سەرکردەی هاوپەیمانی وەتەنییە لە عێراق، ئەیاد عەللاوی وەڵامی ئەو تۆمەتانەی دایەوە کە لەبارەی هەوڵدان بۆ بەدەستهێنانی پۆستی سەرۆکوەزیران ئاراستەی کراوە و راگەیاند کە بەهێچ شێوەیەک رکابەری ئەو کەسانە ناکات کە هەوڵ دەدەن ببن بە سەرۆکوەزیران.

ئەیاد عەللاوی لە هەژماری تایبەتی خۆی لە تۆڕی کۆمەڵایەتی تویتەر نووسیوویەتی "هەوڵ نادەم ببم بە سەرۆکوەزیران و بەهیچ شێوەیەکیش رکابەری ئەو کەسانە ناکەم کە هەوڵەکانیان لەوبارەوە خستووەتەگەڕ".

سەرکردەی هاوپەیمانی وەتەنییە، ئەیاد عەللاوی ئەوەشی گوتووە "دەستلەکارکێشانەوەم لە ئەندامێتی ئەنجوومەنی نوێنەرانی عێراق بۆ رای گشتی روونکردووەتەوە".

ئەیاد عەللاوی راشیگەیاندوو "پێشتر خۆم بۆ پۆستی سەرۆکوەزیران کاندید نەکردووە و ئەمڕۆش خۆم کاندید ناکەم، ئەو پرسە گەلی عێراق بڕیاری لەسەر دەدات".

رۆژی هەینی رابردوو ئەیاد عەللاوی دەستلەکارکێشانەوەی خۆی لە ئەنجوومەنی نوێنەرانی عێراق راگەیاند و هۆکارەکەشی بۆ ئەوە گەڕاندەوە کە ئەنجوومەنی نوێنەران نەیتوانیوە وەک پێوێست مامەڵە لەگەڵ داواکارییەکانی خۆپیشاندەران بکات.

ئەیاد عەللاوی کە لە ٢٠٠٤ تا ٢٠٠٥ سەرۆکوەزیرانی عێراق بوو، سیاسەتمەدارێکی شیعەی عیلمانییە و سەرکردەی هاوپەیمانی وەتەنییە-یە کە لە کۆی ٣٢٩ کورسی ئەنجوومەنی نوێنەران خاوەن ٢١ کورسییە.