هەواڵ

داڤۆس وشه‌ی هه‌رێم و عێراقی له‌ كوردستان كرده‌وه‌

نیوه‌رۆی 22\1\2020 كه‌ هاوكاته‌ له‌گه‌ل 74ـه‌مین ساڵوه‌گه‌ری دامه‌زراندنی كۆماری مهاباد، له‌ كه‌شێكی ساردی شارۆچكه‌ی داڤۆس، دۆناڵد تره‌مپ، سه‌رۆكی ئه‌مریكا، به‌ دانانی ئاڵای كوردستان پێشوازی له‌ نێچیرڤان بارزانی، سه‌رۆكی هه‌رێمی كوردستان كرد. 

دوای کۆبوونەوەیان لە کۆڕبەندی داڤۆس،  نێچیرڤان بارزانی، سەرۆکی هەرێمی کوردستان بەناوی گەلی کوردستانەوە سوپاسی سەرۆ ئەمریکای کرد؛ دۆناڵد ترەمپ، سەرۆکی ئەمریکا رایگەیاند، بەباشی کاریان لەگەڵ هەرێمی کوردستان کردووە.

جێی خۆشحاڵیمە کە لەگەڵ سەرۆک بارزانی کوردستاندام

تره‌مپ

 سەرۆکی ئەمریکا گوتی “جێی خۆشحاڵیمە کە لەگەڵ سەرۆک بارزانی کوردستاندام، ئێمە کاتێکی دیاریکراومان بۆ کۆبوونەوە هەیە. بۆ ماوەیەکی زۆرە دەمانەوێت یەکتر ببینین”. 

لەبارەی هێزەکانیان لە باکووری سووریا گوتی “ئێمە لە هەندێک ناوچەی سنووری سووریا دەرچووین، ئێمە زۆر بەباشی کارمان لەگەڵ تورکیا کردووە لەبارەی ئەو ناوچەیەی پێی دەگوترێت ناوچەی ئارام، من ئەوە بەرزدەنرخێنم کە تاوەکو دەکرێت ئەوێ سەلامەت بهێڵینەوە”. 

ئێمە بەیەکەوە داعشمان تێکشکاند

بارزانی

هاوکات نێچیرڤان بارزانی، سەرۆکی هەرێمی کوردستان لە کۆنگرە رۆژنامەڤانییەکەدا سوپاسی سەرۆکی ئەمریکای کرد و گوتی “ئێمە هاوبەشەێکی گرنگی یەکدین، سوپاس بۆ سەرکردایەتیت، سوپاس بۆ پشتیوانییەکانت، ئێمە بەیەکەوە داعشمان تێکشکاند، بەناوی گەلی کوردستانەوە دەمەوێت سوپاس و پێزانینی خۆمان دەرببڕین بۆ سەرکردایەتی و بۆ پشتیوانییەکەت”. 

هه‌واڵی كۆبوونه‌وه‌ی بارزانی و تره‌مپ له‌ میدیای جیهانی

رووماڵكردنی میدایی جیهانی و به‌تایبه‌ت ئه‌مریكی پرسێكی دیكه‌ی دوای كۆبوونه‌وه‌كه‌ بوو، له‌م چوارچێوه‌یه‌دا كه‌ناڵی فۆكس نیوزی ئه‌مریكی به‌ مانشێتی”سه‌رۆك تره‌پ له‌گه‌ل سه‌رۆكی كوردستان كۆبووه‌وه‌” ده‌ستی به‌ رووماڵی كۆبوونه‌وه‌كه‌ كرد.


به‌هه‌مان شێوه‌، چه‌ناڵی یۆتیۆبی فه‌رمی كۆشكی سپی ڤیدیۆیی كۆبوونه‌وه‌كه‌ی بلاوكردووته‌وه‌ و له‌ تایتڵی ڤیدیۆكه‌ ناوی بارزانی وه‌ك “سه‌رۆكی كوردستان” هێناوه‌، به‌بێ ئاماژه‌دان به‌ (هه‌ریم و عێراق).

ئه‌وه‌ی كورد ویستی داڤۆس كردی

له‌ داڤۆس ئه‌وه‌ی كه‌ جێگه‌ی خۆشحاڵی زۆرێك له‌ كوردستانیان بوو، لابردنی پاشگری (هه‌رێم) و پاشناوی (عێراق) بوو، چونكه‌ ئه‌وه‌ی كه‌ تا ئێستا زۆرێك له‌ كوردستانیانی ئازارداوه‌، ئه‌م دوو ده‌سته‌واژه‌ن، ره‌نگه‌ ئه‌مه‌ سه‌رتایه‌ك بێت بۆ به‌ دیفاكتۆكردنی ئه‌م گۆڕانكارییه‌، ده‌شبێت دڵخۆشی تاكی كورد دوای كوتایی هاتنی لۆتكه‌ی داڤۆس كوتایی بێت، به‌لام هه‌رچونێك بێت، ئه‌مه‌ یه‌كه‌م جاره‌ رووده‌دات.

ئه‌وه‌ی كه‌ تا ئێستا روون نییه‌، ناوه‌رۆكی كۆبوونه‌وه‌ی پشت ده‌رگای داخراوی كۆبوونه‌وه‌ی نێوان بارزانی و تره‌مپه‌، به‌لام ئه‌وه‌ی كه‌ روونه‌، سه‌ركرده‌كان له‌ داڤۆس پلانی یه‌كساڵی ئابووری و سیاسی ناوچه‌كه‌ داده‌رێژن.

دەقی گوتەکانی دۆناڵد ترەمپ، سەرۆکی ئەمریکا: 

زۆر سوپاس، جێی خۆشحاڵیمە کە لەگەڵ سەرۆک بارزانی کوردستاندام، ئێمە کاتێکی دیاریکراومان بۆ کۆبوونەوە هەیە. بۆ ماوەیەکی زۆرە دەمانەوێت یەکتر ببینین. وەک خۆتان دەزانن، ئێمە سوریامان لە ناوچە سنوورییەکان بەجێهێشتووە و ئەمەشمان بەباشی لەگەڵ تورکیا ئەنجامدا، هێندەش باش ئەنجامدراوە کە بەبیری هەر کەسێکدا هاتبێت.

ئێستا ناوچەی ئارامیان هەیە و من پێزانینم بۆ هەموو ئەوانە هەیە وایانکردووە ئەم ناوچانە سەلامەت بن. ئێمە نەوتمان هەیە و هەندێک سەربازمان بۆ پاراستنی نەوتەکە بەجێهێشتووە، چونکە ئێمە نەوتەکەمان بەدەستهێناوە و کاریش لەسەر ئەمە دەکەین و زۆر بەباشی پاراستوومانە.

هەروەها بە هەزاران دەستگیرکراوی داعشمان هەیە، خەلافەتی (داعشمان) 100% تێکشکاند، هەروەها ئەمە ناوچەیەکی زۆر جێگەی سەرنجە. ئێمە پەیوەندییەکی زۆر باشمان هەیە و جێی خۆشحاڵیمە کە لەگەڵ تۆم، زۆر سوپاس.

 دەقی گوتەکانی نێچیرڤان بارزانی، سەرۆکی هەرێمی کوردستان: 

دەمەوێت ئەم دەرفەتە بقۆزمەوە تاوەکو سوپاست بکەم بەڕێز سەرۆک بۆ پێشوازیکردن لە ئێمە لە داڤۆس، وەک خۆشت باستکرد و تۆ دەزانی ئێمە بۆ ماوەیەکی زۆرە چاوەڕێی ئەم چرکە ساتە دەکەین. سوپاس بۆ سەرکردایەتیت، سوپاس بۆ پشتیوانییەکانت، ئێمە بەیەکەوە داعشمان تێکشکاند، بۆیە بەناوی گەلی کوردستانەوە دەمەوێت سوپاس و پێزانی خۆمان دەرببڕین بۆ سەرکردایەتی و بۆ پشتیوانییەکەت، سوپاس.