هەواڵى ناوخۆ

به‌په‌له‌ .. ئەحمەد كانی وه‌ڵامێكی جه‌رگبڕ ئاراسته‌ی لاهوور جەنگی ده‌كات

 

ڕه‌وش پۆست

بەرپرسی لقی دووی پارتی دیموكراتی كوردستان وەڵامی لاهوور جەنگی دەداتەوە و رای دەگەیەنێت كە هەولێر جێگە بۆ ژاوەژاو و تاڵانچیایەتی و كەڵەگایەتی ناكاتەوە و پرسیاری ئەوەی لێ دەكات كە ئاخۆ جگە لە تاڵان و سەرانەوەرگرتن و مەحرومكردنی خەڵك، چیتریان بۆ سلێمانی كردووە تا باسی هەولێر و دهۆك و زاخۆ بكەن.

ئەحمەد كانی، بەرپرسی لقی دووی پارتی لە پێگەی خۆی لە تۆڕی كۆمەڵایەتیی (فەیسبووك) بە نووسینێكی كورت، وەڵامی قسەكانی ئەمڕۆ چوارشەممە ٢٣ی تەمووزی ٢٠٢٠ی لاهوور جەنگی دایەوە و رای گەیاند: “جەنابی لاهوور، لە جیاتی تەنگەنەفەسی و دەنگهەڵبڕین و ڕەزاگرانی و باسكردنی هەولێر و دهۆك و زاخۆ، بۆ ناچی چارەسەری دەردی خۆتان بكەن و ناوماڵتان چاك بكەن؟ لەو بیست و چەند ساڵەدا چیتان كردووە بۆ دەڤەری سلێمانی جگە لە تاڵان و سەرانەوەرگرتن و مەحرومكردنی خەڵك تاكوو بێی باسی هەولێر و دهۆك و زاخۆ بكەی؟
چیتان بۆ زاخۆ كردووە غەیری تەقینەوە و تیرۆر و كوشتنی خەڵكی بێگوناحی ئەم شارە؟ زاخۆییەكان چاویان ئەو دەستسوورانە دەردێنێ ئەگەر بێن خێمەی شوومیان لە شارەكەیاندا هەڵبدەن. دهۆكی دەلال گەرووی هەر خاكفرۆشێك هەڵدەدڕێنێ ئەگەر چاوی تەماح و تاڵانی تێ ببڕێ”.

ئەوەشی وەبیر لاهوور جەنگی هێناوەتەوە كە “ئەوكاتەی هەولێر لەژێر دەستی ئێوەدا بوو، چیتان بۆ هەولێر و هەولێرییەكان كرد؟ خۆ هەموومان بیرمان دێت خەڵك لە سەر و ماڵی خۆی دڵنیا نەبوو. لەبەر دزی و تاڵانییەكانتان خەڵك سەیارەی دەبردە سەربانەكان بۆ ئەوەی لێیان نەدزن و كەس نەدەوێرا كاسبیی بكات نەوەك تاڵانچییەكانتان سەرانەیان لێ بسێنن و سامانیان بدزن. هەولێر چەقی كار و چالاكیتان بوو، بۆیە لە ڕفاندن و تیرۆركردنی خەڵكی نیشتیمانپەروەر و زانا و پیاوی باشی ئەم وڵاتە دەستتان نەپاراست”.

نموونەشی بە چەند تاوانێكی تیرۆركردن هێناوەتەوە و رای گەیاندووە: “كە لە هەولێر بوون، خەڵكی خاوەن فكر و ئاكادیمی و زانای وەك د. محەمەد باجەلان و د. محەمەد قەرەداغی و سەڵاح هەورامیتان تیرۆر كرد. خەڵكی نیشتیمانپەرورەی وەك نەقیب كەمال و محیەدین ڕەحیم و شوان عوسمان بەزاز و عەونی شاكر و دەیانی دیكەتان تیرۆر كرد و ڕفاند و ژیان و ئۆقرەییتان لە هەولێر ستاند”.

ئەحمەد كانی پرسیاری ئەوە لە لاهوور جەنگی دەكات كە “بە چ ڕوویەك دەتانەوێ بێن و ئاسمانی شار تاریك بكەن؟ بڕۆن عیلاجی دەردەكانی خۆتان بكەن و بەڵا و دەنگەدەنگتان دوور بكەنەوە. هەولێر جێگە بۆ ژاوەژاو و تاڵانچیایەتی و كەڵەگایەتی ناكاتەوە”.