هەواڵى ناوخۆ

به‌په‌له‌ .. سۆران عومەر هێرشی تووند دەكاتە سەر ڕێواز فایەق

ئەندامێكی دەست لەكاركێشاوەی فراكسیۆنی كۆمەڵی ئیسلامیی كوردستان لە پەرلەمانی كوردستان، هێرش دەكاتە سەر ڕێواز فایەق، سەرۆكی پەرلەمانی كوردستان.

سۆران عومەر، پەرلەمانتاری كۆمەڵ كە لەسەر چوار دۆسیەی دادگا لە نێویاندا بێسەروشوێنكردنی ڕۆژنامەنووسێك، پارێزبەندی لەسەر هەڵگیراوە و فەرمانی گرتنی بۆ دەركراوە، بۆیە دەستی لەكار كێشاوەتەوە، وتارێكی لە پێگەی خۆی لە تۆڕی كۆمەڵایەتیی (فەیسبووك) بڵاو كردۆتەوە.

سۆران عومەر لە وتارەكەیدا بە توندی هێرش دەكاتە سەر ڕێواز فایەق، سەرۆكی پەرلەمانی كوردستان و تۆمەتی ئەوەی دەداتە پاڵ كە ”لە كاتی هەڵگرتنی پارێزبەندی لەسەرم تەنازولی لە دەسەڵاتەكانی كردبوو“.

سۆران عومەر وەك ئەوەی قەرزێكی لەسەر ڕێواز فایەق و فراكسیۆنی یەكێتی هەبێت و لە بابەتی هەڵگرتنی پارێزبەندییەكەی پێیان نەدابێتەوە، باس لەوە دەكات كە سەرۆكی پەرلەمان: ”ئەوکاتە تەنازولی کرد کە منی تەسلیم بە پارتی کرد و بۆی ڕێک نەکرایەوە“. بۆیە داوا لە یەكێتیی نیشتمانیی كوردستان دەكات كە زیاتر لە فراكسیۆنی كۆمەڵ هەوڵی ڕێگریكردنیان لە هەڵگرتنی پارێزبەندییەكەی دا، ”هەق و حیسابێک لەگەڵ ئەم سەرۆکی پەرلەمانە بكەن“.

لە بەرامبەر ئەو نووسینەیدا، لایەنگرانی یەكێتیی نیشتمانیی كوردستان كۆمێنتیان بۆ سۆران عومەر نووسیوە و بە توندی هێرشیان كردۆتە سەری و بە كەسێكی بێوەفا و دووڕوو ناویان بردووە.