عیراقى و جیهانى

لێدانی خه‌نده‌قه‌كه‌ به‌هاوكاری هاوپه‌یمانان ئه‌نجام ده‌درێ

 

 

 

سەرچاوە ئاگەدارەكان لە هەرێمی كوردستان ئاشكرای دەكەن، كە وەزارەتی پێشمەرگە بودجەیەكی زۆری بۆ پڕۆژەی تەواوكردنی خەندەق كە لە كۆتای ناوچەكانی دەرەوەی ئیدارەی هەرێمی كوردستان لێ دەدرێت و پڕۆژەكەیش بە هاوكاری هاوپەیمانی نێودەوڵەتی بۆ رووبەڕووبوونەوەی داعش ئەنجام دەدرێت.

لێدانی خەندەق لە سنوورەكانی باشووری كوردستان بۆ دوو ساڵ پێش ئێستە دەگەڕێتەوە، كاتێك هێزی پێشمەرگەی كوردستان لە سنوورەكانی لەگەڵ سووریا دەستی بە لێدانی خەندەق كرد، بۆ رێگرتن لە هاتنی تیرۆریستان بۆ ناوچەكانی هەرێمی كوردستان.

ئێستە باس و خواس لەسەر ئامانجی هەرێمی كوردستان لە لێدانی ئەو خەندەقە گەرم بووە و سەرچاوە رەسمییەكانی هەرێمی كوردستان ئاشكرای دەكەن، مەبەست لە لێدانی ئەو خەندەقە بۆ رێگرییە لە هێرشی تیرۆریستان و ئەوانەشی لە بەهێزبوونی باشووری كوردستان دەترسن، باس لەوە دەكەن كە ئەمە جیاكردنەوەی سنووری هەرێمی كوردستانە لەگەڵ ناوچەكانی تری عێراق تا ئامادەسازی بكەن بۆ راگەیاندنی دەوڵەتی كوردی.

پێگەی "كتابات" بڵاوی كردووەتەوە كە بۆ هەڵكەندنی خەندەقەكە 20 شارەزای جوگرافیی ئەمەریكی و فڕەنسی، 25 شارەزای تەكنیكی ئەمەریكی و 40 ئەندازیاری بەریتانی و فڕەنسی و ئەمەریكی و 60 پسپۆڕی بواری تەقەمەنی ئەڵمانی و ئەمەریكی لە پرۆسەی هەڵكەندنی خەندەقەكە بەشدارن.

بەپێی زانیارییەكان كە بڵاو كراونەتەوە، تا ئێستە 65%ی خەندەقەكە تەواو بووە و پێشبینی دەكرێ لە مانگی پێنجی ئەمساڵ تەواوی خەندەقەكە كۆتای پێ بێت و هەموو كارەكانی لە تەواوی سنوورەكانی باشووری كوردستان بە ئەنجام دەگات.

نەسرەدین سندی سەرۆكی دەستەی ناوچە كوردستانییەكانی دەرەوەی ئیدارەی هەرێمی كوردستان لەوبارەیەوە ئاشكرای كردووە، ئەو هەنگاوە مافی هەرێمی كوردستان بۆ دیاریكردنی سنووری سیاسی و ئیداری خۆی، ئەو ناوچانە ئێستە پێشمەرگە دەیانپارێزێت.

لەوبارەیەوە سەركردە لە رێكخراوی بەدر و وەزیری پێشووی مافی مرۆڤی عێراق محەمەد مەهدی بەیاتی دەڵێ، بابەتەكە پەیوەستە بە دووبارە نەخشەكێشانەوەی ئیداری و سیاسی، چونكە هەمووان گەیشتوونەتە ئەو باوەڕەی كە لەسەر دەستی ئەمەریكا، عێراق دابەش دەبێت.