عیراقى و جیهانى

فیدراڵیه‌كه‌ی په‌یه‌ده‌ نه‌ته‌وه‌یی نیه‌

 

 

 

ئەندامێکی تەڤگەری جڤاکی دیموکراتی (تەڤدەم) و سەرکردەی یەکێک لە حزبە کوردستانییەکانی ڕۆژئاوا، ڕایگەیاند: "پارتی یەکێتیی دیموکرات (پەیەدە) هێشتا كارێكی نەتەوەیی نەكردووە و هیچ شتێكی بۆ بەدەستهێنانی مافی كورد ئەنجام نەداوە، بۆیە هیچ بڕیارێكی ئەوانمان پێ ڕاست نییە".

جەدعان عەلی، ئەندامی تەڤدەم کە پەیەدە سەرۆکایەتی دەکات و نوێنەری تەڤگەری چاكسازیی كوردی سووریا لە هەرێمی كوردستان، لە ڕاگەیەنراوێکیدا ئاماژەی بەوە کردوه‌: “بڕیارەكانی پەیەدە لە كوردستانی ڕۆژئاوا دروست نین، بەپێی ئایدۆلۆژیای پەكەكە تاكلایەنانە بڕیار دەدەن، لە کاتێکدا ناكرێت حزبێك تەنیا بڕیار لە چارەنووسی گەلێك بدات، تاوەكو ئێستا لەو ناوچانە ڕژێمی سووریا هەموو دامودەزگای حكوومی و حزبی و ئەمنییەكانی جارانی ماوە و دەسەڵاتی تەواوی بەسەریاندا هەیە".

جەختیشی لەوە کردەوە: “كاتێك ڕێككەوتنێكی كوردی نەبێت و یەكهەڵوێست نەبن لەبارەی پاشەڕۆژی سووریا و ناوچە كوردنشینەكانەوە، ئێمە بە شتێكی دروستی نازانین، پەیەدە سەرەتا ئیدارەیەكی خۆجێیی ڕاگەیاند و دوایی كردی بە كانتۆن، ئینجا كردیانە ئەنجومەنی سووریای دیموكرات و ئێستاش باسی فیدڕاڵی دەكەن.

نوێنەری تەڤگەری چاكسازیی كوردی سووریا لە هەرێمی کوردستان ئەوەشی ئاشکرا کرد کە "ئیلهام ئەحمەد"، سەركردەی تەڤدەم گوتوویەتی: “ئێمە فیدڕاڵییەكی گەورەمان ڕاگەیاند، بەڵام هەندێك برادەر دەیانەوێت بیكەنە نەتەوەیی و ڕەنگی نەتەوەیی لێ بدەن و بچووكی بكەنەوە، جا بەو قسەدا دیارە، ئەو فیدڕاڵییە هیچ شتێكی نەتەوەیی تێدا نییە”.