عیراقى و جیهانى

پارتی جووڵه‌ی به‌هێز نه‌كردوه‌

 

 

 

ئەندامێکی مەکتەبی سیاسی پارتی بەهەموو شێوەیەک رەتیدەکاتەوە هیچ هێزێک بەرەو کەرکووک رۆیشتبێت و رایدەگەیێنێت: نازانم بۆ ئەو ناحەزانە هەوڵ دەدەن و وا دەم بە هاوارن بۆ ئەوەی گەلی کوردستان بکەونە گیانی یەک.

کەمال کەرکووکی، ئەندامی مەکتەبی سیاسی پارتی و بەرپرسی میحوەری رۆژئاوای کەرکووک سەبارەت بەو هەواڵانەی باس لە جووڵەپێکردنی هێز لەلایەن یەکێتی و پارتی لە بیرە نەوتەکانی کەرکووک دەکەن، رایگەیاند: ئەمە پڕوپاگەندەیەکی بێ بنەمایە و مەرامی ناحەزانی گەلەکەمانە.

بەرپرسی میحوەری رۆژئاوای کەرکووک گوتی: هێزەکانی پێشمەرگە بە تایبەتی یەکێتی و پارتی لەو میحوەرەو میحوەرەکانی دیکە وەکو یەک تیم کار دەکەین، هەموو سەرنجی پێشمەرگە لەسەر ئەوەیە چۆن بەرەنگاری دووژمن ببنەوە و تیرۆریستانی داعش تێکبشکێنن و چۆن پێکەوە هاوکاربن.

کەمال کەرکووکی گوتی: نازانم بۆ ئەو ناحەزانە هەوڵ دەدەن و وا دەم بە هاوارن بۆ ئەوەی هێزەکانی گەلی کوردستان بکەونە گیانی یەک، لە بری ئەوە سەرنج بخەنە سەر دووژمن و تیرۆریستانی داعش، لەبری ئەوەی سەرنج بخەنە سەر ئەوەی چۆن کار بکەین دەوڵەتی کوردستانی سەربەخۆ بونیات بنێین و گەلەکەمان لە دەستی ناحەزان و لە مەترسی داهاتوو رزگار بکەین، هێزەکانی کوردستان و لایەنە سیاسییەکان لە یەکدی نزیک بکەینەوە، ئەم پڕوپاگەندانە دەکەن بۆ ئەوەی گەلەکەمان بکەونە گیانی یەک، ئەمە جێگەی داخە.