عیراقى و جیهانى

یه‌كێتی ئاماده‌كاری بۆ كۆنگره‌ ده‌كات

 

 

 

زۆربەی كارەكانی لیژنەی ئامادەكاریی كۆنگرەی چوارەمی یەكێتیی كارەكانی خۆیان تەواو كردووە ‌و تەسلیمی مەكتەبی سیاسی كراون، بەڵام تەنها لیژنەی چۆنێتی كاندیدكردنی ئەندامانی كۆنگرە یەكلا نەكراوەتەوە و له‌ئێستادا هیچ بیانوێك بۆ دواخستنی كۆنگره‌ نه‌ماوه‌ته‌وه‌.

بە پێی پەیڕەوی ناوخۆی یەكێتیی دەبوو لە مانگی شەشی 2013ـدا كۆنگرەی چوارەمی خۆی ئەنجام بدات و بە بڕیاری مەكتەبی سیاسییش چەند لیژنەیەك بۆ ئامادەكاریی كۆنگرە پێك هێنران.

فەرید ئەسەسەرد، ئەندامی سەركردایەتیی یەكێتیی رایگه‌یاندوه‌ زۆربەی زۆری لیژنەكان كارەكانیان تەواو كردووە ‌و ڕاپۆرتی خۆیان داوەتە مەكتەبی سیاسی.

فەرید ئەسەسەرد وتیشی: هەر كاتێك یەكێتی بیەوێت كۆنگرەی خۆی ئەنجام بدات دەتوانرێت هەموو ئەو ڕاپۆرتانەی ئامادەكراون كاریان پێ بكرێت‌ و ئەوانەشی تەواویان نەكردووە لەوێوە دەست پێ بكرێتەوە.

هه‌روه‌ها له‌لای خۆیه‌وه‌ لەتیف شێخ عومەر ئەندامی سەركردایەتی ئه‌و حزبه‌ رایگه‌یاندووه‌ هەموو لیژنەكان كارەكانیان تەواو كردووە، تەنها لیژنەی چۆنێتیی كاندیدكردنی ئەندامانی كۆنگرە تەواو نەكراوە، چونكە ئەوە قسەی زۆری لەسەر مابوو.