عیراقى و جیهانى

به‌غدا ناتوانێ نه‌وتی كه‌ركوك هه‌نارده‌ی ئێران بكات

 

 

 

ئەندامێکی ئەنجومەنی پارێزگای کەرکووک لەسەر پرسی ناردنی نەوتی شارەکەیان باس لەوە دەکات، ئەو پرسە بەبێ ئاگاداریی ئەنجومەنی پارێزگا و ھەرێمی کوردستان سەرناگرێت، بەرپرسێکی پارتیش دەڵێت: "ھەوڵێکی گەورە لەدژی کەرکووک ھەیە".

لەسەر ناردنی نەوتی کەرکووک، بۆ ئێران، کاوێز مەلا پەروێز، بەرپرسی دەزگای ڕۆشنبیر و راگەیاندنی پارتی لە کەرکووک بە (باسنیوز)ی راگەیاند، نەوتی کەرکووک بووەتە جێگەی تەماحی نەیارانی کورد و دەیانەوێت لەبەغداوە شەرعیەت بە فرۆشتن و مامەڵە لەسەر کردنی بدرێت.

کاوێز مەلا پەروێز هەروەها رایگەیاند، کە تا وەزارەتی سامانە سروشتییەکانی حکوومەتی هەرێمی کوردستان بڕیاری لەبارەوە نەدات، ”کەس ناتوانێت شەرعیەتی پێ بدات و کەسیش ناتوانێت مامەڵەی پێوە بکات“.

ئەو بەرپرسەی پارتی پێیوایە مەترسییەکی گەورە لەسەر نەوتی کەرکووک هەیە و بە پێویستی دەزانێت لایەنی کوردی کار بۆ پاراستنی نەوتی کەرکووک بکات.